Энэ зуны хамгийн оюунлаг, үзэж харах, сурч судлах, өвлөн уламжлах, баясан бахархах зүйлсээр арвин “Нүүдэлчин” дэлхийн соёлын фестивалийн өдрүүдэд “Нүүдэлчин” их тайзнаа зохион байгуулах арга хэмжээний мэдээллээс товчлон хүргэе.

 “Нүүдэлчин” дэлхийн соёлын фестивалийн нээлтийн үйл ажиллагаа 2023 оны 08 дугаар сарын 18-ны өдрийн 15 цагаас эхэлнэ.

 Нэгдсэн хөтөлбөрт бичсэний дагуу 21 аймаг, нийслэл, оролцогч улс орнуудын өвлөн уламжлагч, ардын авьяастнууд нутаг нутгийнхаа уламжлалт зан үйл,онцлогийг илтгэсэн язгуур урлагийн тоглолт, үзүүлбэрээ гурван өдрийн турш олон нийтэд сонирхуулах юм.

Нүүдлийн соёл иргэншлийн өвийг баяжуулан хөгжүүлэгчдийн зан үйл, баяр наадам үргэлжлэх хоёр дахь өдөр буюу 2023 оны 08 дугаар сарын 19-нд “Нүүдэлчин” их тайзнаа “Монгол түмний их цэнгэл наадаан” хүндэтгэлийн тоглолт болох бөгөөд урлаг соёлын алдартнууд оролцоно.

Онцлон хэлэхэд энэ өдөр оролцогч гадаад орнууд Бүгд Найрамдах Солонгос Улс, Бүгд Найрамдах Казакстан Улс, Бүгд Найрамдах Киргиз Улс, Бүгд Найрамдах Хятад Ард Улсын ӨМӨЗО, ОХУ-ын Бүгд Найрамдах Буриад Улс, ОХУ-ын Бүгд Найрамдах Халимаг Улс, ОХУ-ын Бүгд Найрамдах Саха Улс, ОХУ-ын Бүгд Найрамдах Тува Улсын өвлөн уламжлагч, ардын авьяастнууд язгуур урлагийн тоглолтоо сонирхуулна. Мөн аймгууд нэгдсэн хөтөлбөрт бичсэн цагийн хуваарийн дагуу язгуур урлаг,  өв соёлын үзүүлбэр, хөтөлбөрөө үзүүлэх ажээ.

Харин фестивалийн сүүлийн өдөр аймгуудын язгуур урлаг, өв  соёлын хөтөлбөр хуваарийн дагуу үргэлжлэх бөгөөд “Нүүдэлчдийн гоёл” үндэсний хувцасны үзүүлэх тоглолт, оролцогчдын нэгдсэн тоглолт, хаалтын үйл ажиллагаа болсноор баяр бахдал дүүрэн, баялаг бүтээл өрнүүн өнгөрүүлсэн “НҮҮДЭЛЧИН”  дэлхийн соёлын фестиваль өндөрлөнө.